纖體美容騙局鬧得火熱，業界形象插水...
害得 Dozy 很多老老實實經營的 Client，亦無辜受到牽連。其實講到投訴，來來去去都是其中幾間廣告鋪天蓋地的大集團，之前有人投訴被剝光豬，搶信用卡狼碌九萬！今次到招代言人被屈，真係俾佢玩死~~

話時話...大約兩星期前我亦收到該集團的推銷電話...
話請我做纖體代言人，聽見個公司名就知唔妥啦，你估我第一日識你咩？！幾年前已經同大老闆交過手啦，一開口就話搵我做代言人，問我幾高？幾重？我話 5 呎 10 吋高，130 磅，係...專登講個過輕的，呢個磅數直頭係非洲肌民咁啦，點知佢話我肥，啱做代言人 @@...！

抵死！...唔係落井下石，但是受騙者自己的確要負上很大責任！...
並不是說沒有代言人這回事，只是從銷售手法，已經知道搵笨啦！...
當年我在其中一個纖體美容集團做 Marketing Manager 確有行真人實證，都是經過千挑萬選的！樣貎、身型、心理狀態、可減空間等，見兩三次面，詳細評估才決定。事實上我們亦投放了很多廣告，以真人實證作主打，電視節目、巴士電視、報章雜誌都有實證廣告，點會講幾句就揀中你？！

又有人投訴話...廣告又話幾百元，上到去落閘放狗，殺我幾萬元！...
大佬呀...幾百元？口靚模個 Bra 都唔夠買啦，地鐵燈箱半塊都買唔到啦，幾百？咁都信？你話係咪你自己問題先？大集團的 Sales 好多都個個月出幾四五萬，甚至過十萬人工架！老老實實話你知幾千元你又唔信，係要寫幾百元先至送上門，仲唔抵死！

想當年公司做 Marketing，真係 Sell 實力...

以下轉載... 

消委會最新一期《選擇》月刊指出，今年頭 8個月共收到 1,059宗美容業的投訴，關於纖體中心的投訴 86宗，其中 31宗與免費纖體合約及招募代言人有關。消委會宣傳及社區關係小組副主席許樹源表示，該些纖體中心及美容院並會用電話促銷，引誘消費者到美容院傾談，提醒消費者小心免墮圈套，「如果話一個月減到 15磅做招徠，都已經知道對健康有影響。」

沒收所付保證金

他指，美容院會先要求消費者簽訂協議書，列明參加者在指定期內減去一定磅數便可免費享用療程。參加者需先繳交一筆保證金，美容院會分開 12期退回，但即使參加者達到目標，每個月也要維持磅數並到美容院磅重才可獲退款。美容院又會不斷游說參加者購買其他產品及療程。有個案繳交 9,000元按金，並與美容院簽訂 3個月減去 21磅的合約後，瘦身期間被游說購買 2,000元療程及減肥產品，但完成 11次療程後只減去 6、 7磅，最終要求退款，美容院拒絕，並回覆：「減肥效果係咪成功同持久，除做療程外，亦要客人配合均衡同健康飲食，同時，客人本身生活習慣或體質都影響減肥效果。」
另一名投訴人收到纖體公司電話邀請作代言人，聲稱可在兩個月內免費為她進行 46次療程減去 15磅，但就要求投訴人先付接近 2.5萬元，達標後便會分 12期退回，若首月減去 10磅更可獲退 5,000元作鼓勵。但投訴人在首三星期只減去兩、三磅，被游說「加碼」 7,000元購買中醫針灸療程；第二個月減去 5磅，美容院即減少部份療程放慢步伐，最後投訴人也未能取回保證金。

少女誤信電話促銷被騙三萬元

現年 28歲的阿思（化名）誤墮減肥中心的免費纖體代言人陷阱，不但付了一筆逾 2.4萬元的代言人按金，還被中心職員游說額外參加逾萬元的減肥套餐，但她連做兩個月仍未見減去中心保證可減的 10磅肥肉，要求解約退款不果。減肥不成，荷包卻大減磅，被騙逾 3萬元，現經消委會向有關減肥中心追討。
阿思今年 6月中接獲一間大型連鎖減肥中心來電，表示減肥套餐只需數百元。她心動上門參加，遭游說參加纖體代言人，費用全免，保證可減 10磅，但要簽約一年，並支付 2.4萬元按金，「啲職員話以前唔使畀按金，但係有啲代言人減咗肥之後去如黃鶴，所以家要交按金；但每個月會退番 2,000蚊嘅。」

職員游說做額外療程

阿思表示， 7月首次到中心進行纖體療程，職員不斷游說她額外做淋巴療程，付費 7,000元；翌月又要她購買纖體食療，再付 3,000元，「但我做咗兩個月，都係減到幾磅，見效果唔得，咪要求退番啲按金，佢哋淨係畀番頭兩個月按金共 4,000蚊，其他唔肯退。」